தமிழ் எழுத்துக்கள் முந்நூற்றுப் பதின்மூன்றா அல்லது முப்பதா? - பகுதி - 4

உயிரெழுத்துக்கள்

அ, இ, உ, எ, ஒ என்பவை ஒரு மாத்திரை அளவு உச்சரிப்புக் காலத்தைக் கொண்டவை. இவை தவிர்ந்த மற்ற உயிரெழுத்துக்கள் இந்த ஐந்தினதும் நீண்ட ஒலியுடையவையே. அதாவது கால மாத்திரை நீட்டப்பட்டவை என்பது நம் எல்லோருக்கும் தெரிந்த உண்மை.

அத்துடன் “ஐ, ஔ” ஆகியவை தனி உயிரெழுத்துகள் என்று கொள்ளாமல் அவற்றை ’அய்’ என்றும் ’அவ்’ என்றும் கொள்ளலாம்.

அப்போ, ஆ, ஈ, ஊ, ஏ, ஓ ஆகிய எழுத்துக்களை மாற்று வழியில் கொணர்வோம். இதற்காக சில ஒலி அழுத்தக் குறிகளை அறிமுகம் செய்து இவற்றை உருவாக்கும் வழியை பார்ப்போம்.

ஆ:

இது ‘அ’ இற்கு மேலே ஒரு கிடைக் கோடு போடுவது.

இதே போலவே எல்லா குறுகிய ஓசையுள்ள உயிரெழுத்துக்களின் மேலே கோடு போட்டு எழுதுவதன் மூலம் நீண்ட ஓசை உடைய உயிர் எழுத்துக்களை எழுதலாம்.     

     இவ்வாறாக நீண்ட ஓசை எழுத்துக்களுக்கு ஒலி அழுத்தக் குறிகளை உபயோகிப்பதன் மூலம் பல உயிர் மெய்யெழுத்துக்களையும் எழுதும் முறை இலகுவாக்கப்படப் போகின்றன.

எளிய அரிச்சுவடி

உயிரெழுத்துக்கள் 12 என எம் இலக்கண நூல்கள் சொல்கையில், நாம் இனிவரப் போகும் அடிப்படை உயிரெழுத்துக்களை, உயிர்ச் சுவடிகள் என அழைப்போம். அவ்வாறே அகர மெய்யெழுத்துக்களை அடிப்படை எழுத்துக்களாகக் கொண்டு வரும் மெய் வடிவங்களை அறிமுகம் செய்து அவற்றை மெய்ச் சுவடிகள் என அழைப்போம். இவற்றோடு பயன்பாட்டுக்கு எடுக்கும் ஒலியழுத்தக் குறிகளை அழுத்தச் சுவடிகள் எனவும் அழைப்போம்.

இப்பொழுது எளிதாக்கப் பட்ட அரிச்சுவடி 30 கட்டங்களில் சுவடிகளைக் கொண்ட ஒரு அட்டவணையே.        

 க - வை உதாரணமாகக் கொண்டு இந்த எழுத்துக்களை அடையாளம் காண்போம்.

இப்பொழுது நம் அரிச்சுவடி 24 எழுத்துக்களுடனும் 6 ஒலிக் குறிப்புக்களுடனும்  இலகுவான ஒரு அரிச்சுவடியாக வந்து விட்டது.

இத்தோடு, கிரந்த எழுத்துக்களுக்கும், மேலதிக சேர்க்கைத் தேவைகளுக்குமாக சில அதிகாரங்கள் இருக்கின்றன. அவற்றை பின்னர் ஒரு முறை பார்க்கலாம்.

சுருங்கிய எளிதான தமிழ் அரிச்சுவடி இதோ 

பகுதி 3

நன்றி 

தமிழ் எழுத்துக்கள் முந்நூற்றுப் பதின்மூன்றா அல்லது முப்பதா? - பகுதி - 3

எழுத்து எண்ணிக்கைக் குழப்பம் தவிர்த்தல்

முதலில் 247 அல்லது 313 எழுத்துக்கள் கொண்ட தமிழ் அரிச்சுவடி என்ற மிரட்டல் அறிமுகத்தை அகற்ற ஒரு வழி காண்போம்.  அதாவது பழைய நூல்களில் வரையறுக்கப்பட்டுள்ளது போல் தமிழ் எழுத்துக்கள் முப்பதும் ஆய்தமும் ஆக 31 என்றே ஆரம்பிப்போம்.

உயிர்மெய் எழுத்துக்கள் என்பவை மெய்யுடன் உயிர் சேர்ந்து பிறப்பவை.

அதாவது:       க் + ஒ = கொ                  ட் + இ = டி

இப்படி உருவாகும் எழுத்துக்களுக்குப் புதுப் புது வடிவங்கள் கொடுக்கப்பட்டு இருந்தமையால் அவற்றிற்கு எனத் தனியான எழுத்துக்களை வைத்து நம் அரிச்சுவடியைப் பருக்க வைத்துக் காண்பிக்க நேர்கிறது. உயிர்மெய் எழுத்துக்களின் சீரற்ற உருவாக்கல் முறை அவற்றை அட்டவணைப் படுத்திக் கொடுக்க வேண்டிய நிர்ப்பந்தத்தை ஏற்படுத்துகிறது. இதனைத் தவிர்த்து அவற்றின் உருவாக்கலை எளிதாக்க முடிந்தால் பெரிய தனி அட்டவணையைத் தவிர்க்க இயலும்.

தற்போது உயிர்மெய் எழுத்துக்கள் உருவாக்கலில், உகரம் மற்றும் ஊகாரம் தவிர்ந்த மற்றைய எழுத்துக்கள் இலகுவில் அறிமுகப்படுத்தக் கூடியவையாகவே இருக்கின்றன. இருந்தும்,  ஒகரம், ஓகாரம் போன்ற எழுத்துக்களுக்கு, முன்னும் பின்னும் குறிகளாகக்  கொம்பையும் காலையும் சேர்க்கும் முறையை எளிதாக்கலாம். இவற்றைக் கருத்திற் கொண்டு  ஒலி அழுத்தக் குறிகள் என்ற சில குறிகளை ஒருசீராக, முறையாக அறிமுகப்படுத்தி உயிர்மெய் எழுத்துகளை ஒரு எளிதான சீரான சேர்க்கை மூலம் எழுத  வேண்டும்.

ஒலி அழுத்தக் குறிகள்

உலகின் பல மொழிகளில் ஒலி அழுத்தக் குறிகள் உபயோகத்திலிருக்கின்றன. இவற்றைத் தனியாக எழுத்துக்கள் என்று அறிமுகப்படுத்துவதோ அல்லது எண்ணுவதோ இல்லை. அவை வெறும் ஒலிச் சேர்க்கைகள். தமிழின் மெய்யெழுத்துக்கள் கூட இப்படியான ஒரு குற்று அல்லது புள்ளி என்ற ஒலிக்குறிப்போடு கூடிய ஒரு எழுத்தே.  ஆக  ’க’ இற்குக் குற்றுப் போட்டால் ’க்’. இது போலவே உயிர்மெய் எழுத்துக்கள் உருவாக்கலை நாம் குறைந்தபட்ச சீரான ஒலியழுத்தக் குறிகளுடன் உருவாக்கத் தேவையான ஒலியழுத்தக் குறிகளை உட்கொணர்வோம்.

இப்படி ஒலியழுத்தக் குறிகள் மூலமாக அரிச்சுவடியின் எழுத்துக்களின் எண்ணிக்கையைக் குறைக்கும் போது, நமது அரிச்சுவடி இலகுவடையும்.

ஒலி அழுத்தக் குறி 1. குற்று அல்லது புள்ளி

இகர உயிர்மெய்க்கு தற்போதிருக்கும் விசிறியே ஒலியழுத்தக் குறி.

இகர உயிர்மெய் –  ⃞+இ -  வலது பக்க மேல் நுனியில் விசிறி இடுதல்

ஒலி அழுத்தக் குறி 2. விசிறி

உகர உயிர்மெய் வெவ்வேறு மெய்களுக்கு வெவ்வேறு தோற்றத்தில் தற்போது காணப்படுகின்றன. இதற்காக எல்லா மெய்களின் மேற் பொருந்தக் கூடியதாக ஒரு பொதுவான ஒலியழுத்தக் குறியைஅறிமுகப்படுத்த வேண்டும். 

சில வட எழுத்துக்களிற் காணப்படும் உகரம் (ஸு) பயன்படுத்தக் கூடியதாக இருந்தாலும் அது சில எழுத்தின் வடிவை விகாரப் படுத்துவது போல் உள்ளது. எடுத்துக் காட்டாக ம, ய, ந, ந போன்றவை. அதனால் புதிய இலகுவான ஒரு ஒலியழுத்தக் குறியாக ஒரு நிலைக் கோடு ஒன்றை அறிமுகம் செய்யலாம்.

உகர உயிர்மெய் – ⃞+உ -  மெய்யின் வலப் பக்கத்தில் ஒரு நிலைக் கோடு

 ஒலி அழுத்தக் குறி 3. வலப் பக்கத்தில் ஒரு நிலைக் கோடு

எகர உயிர்மெய்க்கு தற்போதிருக்கும் ஒற்றைக் கொம்பு ஒலியழுத்தக் குறி.

எகர உயிர்மெய் – ⃞+எ - மெய்யின் இடப் பக்கத்தில் ஒற்றைக் கொம்பு - 

ஒலி அழுத்தக் குறி 4. கொம்பு 

ஒகர உயிர்மெய்க்கு ’ஒ’ வைப் போலிருக்கும் ஒரு குறியை அறிமுகம் செய்வது நன்று. அதாவது இரட்டைக் கொம்பை 90 பாகையால் வலப்பக்கச் சுழற்சி செய்தால் வரும் எழுத்து இதற்குப் பொருத்தமாக இருக்கும். இதனை மெய்யின் இடப்பக்கத்தில் இட்டு ஒலியழுத்தக் குறியென ஏற்போம்.

ஒகர உயிர்மெய் - ⃞+ஒ - இடப் பக்கத்தில் சரிந்த இரட்டைக் கொம்பு (”ஒ” போல) -

ஒலி அழுத்தக் குறி 4. ஒகரம் 

இவ்வாறாக இருப்பவையும் புதியவையும் கீழ்க் காணும் அட்டவணையில் தரப்படலாம்.

இதுவரை நாம் பார்த்தது குறுகிய ஒலி வடிவ மெய்யெழுத்துக்களையே. நீண்ட ஒலியுடைய எழுத்துக்களைப் பற்றி இன்னும் சற்று விரிவாக நோக்க இருப்பதால் அவற்றை இனி வரப் போகும் விளக்கங்களுக்குப் பிறகு காண்போம்.

அடுத்து

பகுதி 2