தமிழின் தரம் பேணல்

அண்மையில் ஒரு தமிழகத்  தொலைக்காட்சியில் ஒரு பட்டிமன்றம் பார்த்தேன்.
அதிலே பேசியவர்கள் பேராசிரியர்களும் வக்கீல்களும் கவிஞர்களும் எழுத்தாளர்களும். அவர்கள் தம் பேச்சைத் தொடங்கும்போது அழகு தமிழிற் தொடங்கி வணக்கவுரை முடிந்ததும் விவாதத்தைத் தொடங்கும்போது தூய்தற்ற தமிழில் ஆரம்பித்தார்கள்.

இப்படிப் போகிறது அவர்கள் பேச்சுகள். “இன்னிக்கி என் வூட்டுக்கார அம்மா சொன்னாய்ங்க ……..”.

வியப்பாக, வேதனையாக இருக்கிறது. படித்த தகுதிகள் பல மிக்க இந்தப் பேச்சாளர்கள் ஒரு மேடையில், இப்படிப் பேசுவது எவ்வளவு தவறென்பதை அறியாதவர்களா? இவற்றைப் பார்ப்பவர்கள் முக்கியமாகக் குழந்தைகள் அறியப் போகும் தமிழ் எது? தூய்வற்ற தமிழ் தானே? நல்ல தமிழ் கற்கவோ எழுதவோ அவர்கள் சங்க இலக்கியங்களையா தேட வேண்டும்? தனியாக ஒரு பள்ளிக்கா செல்ல வேண்டும்? கண்டு கேட்டுப் படிக்க முடியாத மொழியா நம் மொழி?

”தழிழின் சிறப்பு அதன் தொன்மையில் இல்லை அதன் தொடர்ச்சியில் இருக்கிறது” என்று ஒரு ஆய்வாளர் சொல்கிறார். நாம் தமிழை மேடைகளில், தூய்வற்ற முறையிற் பேசினால், தொடர்ச்சி எப்படித் தொடரும். சங்க காலத் தமிழோடு தமிழின் தரம் போய் விடுமே.

சங்க இலக்கியங்கள், திருக்குறள் மற்றும் 200 ஆண்டுகளுக்கு முந்தைய  தரமான படைப்புகளுக்கு விளக்கவுரை எழுத வேண்டிய நிலை ஏன் எழுகிறது? தமிழைத் தரமாகப் படிக்காதவர்கள் பொறுக்கி வைத்திருக்கும் தமிழறிவைக் கொண்டு அந்த இலக்கியங்களைப் படிக்க முயலும்போது இன்னிலை உருவாகிறது.

ஏன், பாரதியின் கவிதைகளுக்கே விளக்கவுரை கேட்போர் இப்பொழுது இருக்கிறார்கள். அவ்வளவு தரம் அவர்களின் தமிழ்த் தரம்.

இன்றைய கவிஞர்கள், எழுத்தாளர்களிற் பலர், தூய்தற்ற தமிழ்ச் சொற்களைக் கொண்டு தமது ஆக்கங்களை உருவாக்குகிறார்கள். இவர்களின் படைப்புகள் ஒரு பானை பாலில் ஒரு துளி நஞ்சு போலத் தமிழைக் கொல்லும் ஆயுதங்கள். இதைப் படைப்பாளிகள் உணர வேண்டும்.

தூய தமிழைப் புழங்குவோம் என்று, மேடைகள், படைப்புகள், ஊடகங்கள் என்பவை தம் கடமையாக உறுதிமொழி எடுத்துக் கொள்ள வேண்டும். அப்பொழுது தான் தமிழ் சிறக்கும்.

கானல் நீர்

இல்லாதவற்றை இருப்பதாய் எண்ணித்
தள்ளாடும் தமிழுலகே இந்தப்
பொல்லாத எண்ணங்கள் உன்னை யிங்கே
செல்லாத காசாகச் செய்விக்குங் கொடுமையைக்
கல்லாக உணராது கனவுலகில் வாழ்ந்து
கணக்கின்றித் துய்க்கின்றீர் துயரை நீரே

அண்மையில் மறைந்திட்ட அம்மாவை நீரும்
அதிகமாய்ப் புகழ்ந்திட்டீர் ஆறுதல் அடைந்திட்டீர்
அவர்செய்த தொண்டுகள் எவ்வளவே யானாலும்
அத்தோடு செய்திட்ட எண்ணற்ற கொள்ளைகளை
எண்ணித்தான் பார்த்தீரோ நிறுத்துத்தான் பார்த்தீரோ

நாடகந்தோறும் நல்லோராய் நடிப்போரை
தலைவா வென்றும் தளபதி யென்றும்
மகுடமும் மதிப்புங் கொடுப்பீர் நீரே
நாடக மகற்றி அவர்தம் தகுதி
மதித்துப் பார்த்தீரோ அனு பவித்துப் பார்த்தீரோ

சரியோ பிழையோ எதுவானாலும்
அளவேயிலாது தூக்கிப் பிடித்து
அலட்டிக் கொளாது முன்னோர் போல
ஆய்ந்து அறிந்து நீதி செய்தால்
பாரோர் போற்றும் வல்லவராய்
நாமும் உலகில் நிலை பெறலாம்

2017-01-14 பொங்கல்